فلسفه ؟ فضفضه؟

لاحظتوا احيانا كيف في ناس نلتقي فيهم مره وحده بحياتنا وتجلس ذكراهم بأذهاننا فتره طويله؟

 

واحيانا تجلس ذكراهم معنا طول العمر على الرغم من ان لقائنا فيهم كان لمده قصيره..احيانا الي يجلس بآذهاننا ابتسامه او كلمه صادقه من احد..حلو انك تترك اثر بحياة الي تمر عليهم..حلو تترك وراك ناس تدعي لك بظهر الغيب..

في ناس تتمنى تجلس صورتهم بأول لقاء لكم مطبوعه بذاكرتك وما تنمحي ابد…وفي ناس نلقتي فيهم وعلى قد ما نتمنى نقرب منهم لكن ما نقدر او ما يكتب لنا اننا نكون اكثر من اشخاص عابرين بحياتهم ..

على قد ما نتمنى قربهم على قد ما الموضوع لما يكون فيه مشاعر كثير يكون اعقد…

كلامي مو محدود بمفهوم الحب او الاعجاب بشخص..احيانا تلاقي ناس وتتمنى تكون من اقرب اصدقائهم لانك لاقيت فيه طيبه و بياض قلب وشفافيه…و مع ذلك ما يقدر لنا هذا الشي..الحسن بالموضوع اننا حصلت لنا فرصه نلاقيهم ولو مره..وحصل لنا فرصه نعرف انه لسى في ناس زيهم موجوده..

 

ناس ما يأثر فينا مكانتهم العلميه او الاجتماعيه..ولا نتعامل معاهم بالوهميات العرقيه بالمجتمع…هذولي ناس يجبرون حتى المتعصب لفكر جاهلي قديم يحترمهم بأخلاقهم  و بابتسامه يهدونها لكل الي يمر عليهم

 

وفي نوع ثاني من الناس، نلتقي فيهم…نعجب فيهم..بس نختار نكون بعاد عنهم لأننا ما نبغى نشوه الصوره المثاليه الي رسمناها بمخيلتنا عنهم، لاننا بالاخير عارفين ان لكل انسان عيوبه ومع ذلك نصر على وجود المثاليه او الآشخاص المثاليين.

النوع هذا برضو يجبرك تحترمه بسبب اخلاقه الجميله و مواقفه معاك لكن زي ما قلت، نختار نكون بعاد عنهم عشان ما تتأثر صورهم بمخيلاتنا..حتى لو  كنا بهذا الشي نضيع علينا فرصه ذهبيه لاكتساب شخص ممكن يعني لنا الدنيا. 

 

 

مو عارفه ليش جالسه اكتب هذا الكلام او ايش الفكره الي ابغى اوصل لها منه…لكنني ممتنه لكل شخص تعرفت عليه بحياتي

 و غير جواتي شي للافضل ولو كان صغير…

 

.اتمنى اني بيوم من الايام اكون هذا الشخص الغريب خفيف الروح طيب الاثر بالنسبه لأحد